SENDA LITORAL AROUSA NORTE POR RIANXO

A cara norte da enseada de Rianxo permite un paseo pola Praia da Torre. Preto do paseo marítimo xunto á desembocadura do río Te, atópase o xacemento do Castelo da Lúa construído no século XIII polo primeiro señor de Rianxo, despois utilizado como cárcere e destruído na revolta irmandiña.
O paseo continúa ata chegar ao núcleo urbano onde se pode visitar o casco antigo ou a Capela de Guadalupe que contén a imaxe da Virxe.
Dende a saída do núcleo urbano ata que se comeza a ver a entrada do río Ulla cómpre remontar varios tramos esixentes con pendentes entre o 15 e o 20%.
Un pequeno desvío fará unha parada obrigada na ladeira do monte Palleiro onde se atopa a Punta das Trece Cruces, que marca hoxe en día a chamada Ruta do Mar de Arousa e río Ulla, para xa continuar acompañando ao río Ulla na súa desembocadura.
Este último e pequeno tramo polo esteiro do Ulla rebaixa a intensidade da ruta ata deixar o final da Senda Litoral Arousa Norte no límite do Concello de Dodro.

77 IBP

Índice de dificultade

Enseada de Rianxo

O paseo marítimo permite chegar ata a praia de Tanxil e o porto de Rianxo cheo do encanto dos pobos mariñeiros. A enseada de Rianxo acolle importantes actividades náuticas como as regatas.

Esteiro do río Ulla

A desembocadura do río Ulla situada fronte á Illa de Cortegada, é unha das zonas máis significativas das rías galegas dende o punto de vista ecolóxico, con gran riqueza en árbores de río e zona de marisma.

Punta das Trece Cruces

Tamén coñecida como Punta das Tres Cruces, forma parte dun viacrucis único en Europa que preside a ruta Traslatio, o itinerario da chegada do corpo do Apóstolo por mar e a súa entrada en Galicia a través do río Ulla.